NGOKA a li minista gwelongo, uunkulungu nomithigululwakalo Katrina Hanse-Himarwa okwa thaneka okugalukila mopolitika, konima yoomvula dhi li ne sho a kala a mwena po.
Okwa popi kutya okwa hala okupewa onkatu yuupeviamushangandjayi wongundu yoSwapo momahogololo gongundu yawo ngoka ga tegelelwa pehulilo lyomvula ndjika.
Ashike nando ongaaka, ompito ndjoka oyi li momake gokomitiye yongundumutima yoSwapo.
Hanse-Himarwa (52), momasiku 8 Juli 2019 okwa monika ondjo komupanguli Christie Liebenberg mompangu yopombanda, muulingilingi welongitho pambambo lyonkatu ye yuungoloneya woshitopolwa shaHardap sho i idhopo momusholondondo gwaamboka ya li taya pewa omagumbo moshitopolwa, sho a kutha mo mboka ya li mo noku ya pingena po naapambele ye, sha ningwa muDesemba 2014.
Okwa li a pewa egeelo lyomwedhi 24 mongali – moka oomwedhi 12 dha kuthwa ko nenge a fute ooN$50 000
Hanse-Himarwa okwa popi kutya okwa pyakudhukwa okulongela oshigwana ngele ongundu yawo naaleli oye mu taamba ko.
“Onda kala tandi dhengelwa kiilyo tayi pula ngele onda hala okugaluka nokuthikamena onkatu ndjoka. Onde shi pitika molwashoka okuza poomvula 12 onda kala momitungilo dhongundu yoSwapo. Onda koko okuya pombanda, kandi na onkatu ndjoka nda nuka po. Onkene okwiikwatelela kowino notseyo yandje melelo, ngele oya hala ndje, oshike tashi imbi? [ondi na oku shi ninga]. Onda pyakudhukwa,” osho Hanse-Himarwa a popi ngaaka.
Ashike okwa popi kutya nonando ongaaka, ongundu yawo oyi na oompango nomilandu dhi na okulandulwa. Okwa popi kutya oshi li momake gongundupitithi osho wo okomitiye yongundumutima okuninga omatokolo gaamboka taya ulikwa oku ka thigathana po momahogololo gongundu.
